Калядны турнір на прыз Прэзідэнта Беларусі ўжо чатырнаццаты раз адкрыўся ў Мінску. Па традыцыі напярэдадні аднаго з галоўных праваслаўных свят на "неафіцыйны чэмпіянат свету па хакеі сярод аматараў" сабраліся мацнейшыя каманды з Беларусі, Расіі, Балкан (аб'яднаная зборная), Швейцарыі, Чэхіі, Швецыі, ААЭ і – упершыню – Кітая. Дарэчы, Мінск сёння прымае спартсменаў яшчэ і ў статусе адной са сталіц хакейнага ЧС-2021: у маі 2017-га Беларусь і Латвія з сумеснай заяўкай заваявалі права прыняць сусветны форум. І як на цырымоніі адкрыцця заўважыў Прэзідэнт, "гэта было б немагчыма без тых хлопцаў і ў добрым сэнсе слова чыноўнікаў, функцыянераў ад спорту, якія прыязджалі да нас сюды, у Мінск, на Калядны міжнародны турнір".
І яшчэ адно сімвалічнае новаўвядзенне цяперашніх хакейных баталій у Мінску: разам са знакамітымі спартсменамі Каляднага турніру на лёд сталічнай "Чыжоўка-Арэны" паралельна выйшлі і юныя аматары – удзельнікі знакамітых спаборніцтваў "Залатая шайба", адноўленых у 1997 годзе па ініцыятыве кіраўніка дзяржавы Аляксандра Лукашэнкі.
8 каманд з розных краін, відовішчны хакей на лёдзе мінскай "Чыжоўка-Арэны", запоўненыя азартнымі балельшчыкамі трыбуны і, вядома, самыя яркія моманты Каляднага турніру-2018 – у рэпартажы!