Фестываль блізнят і двайнят "Шчасце ўдвайне" ў Мінску

Адной з самых цікавых падзей у праграме Тыдня маці-2017 у Беларусі стаў фестываль блізнят і двайнят "Шчасце ўдвайне", які 14 кастрычніка сабраў у Нацыянальным выставачным цэнтры "БелЭкспа" ў Мінску рэкордную колькасць удзельнікаў – 217 сем'яў з розных куткоў краіны, прычым 12 з іх выхоўваюць трайнят. Цікава, што ў 2014 годзе дэбютны фэст наведалі 48 сем'яў блізнят, у 2015-м – 62 сям'і, а ўжо ў 2016 годзе – 175.

Фестываль адбыўся ў межах традыцыйнай выстаўкі-форуму "Мацярынства і дзяцінства" і аб'яднаў мноства відовішчных і пазнавальных мерапрыемстваў для дзяцей і дарослых: парад блізнят і двайнят, агляд таленавітых дуэтаў, модныя паказы і прэзентацыі касцюмаў family look, а таксама фотасесія... А завяршылася актыўная праграма дыскатэкай Trolls Party, дзе маленькіх гасцей сустракалі любімыя мультперсанажы – вясёлыя тролі Розачка і Цвятан.

Самыя запамінальныя моманты дзіцячага фестывалю, чароўныя ўсмешкі блізнят, і, вядома, цёплыя абдымкі бацькоў – у нашай фотагалерэі.

На фота: Таццяна, Аліна, Паліна Ажашкоўскія