Снежная восень-2016 у Беларусі
Заснежаныя вуліцы і прахожыя, якія хутаюцца ў цёплыя шалі, белыя камякі, што кружаць у паветры на фоне лістападу, чароўныя пейзажы, дзе змяшаліся і яркія фарбы восені, і серабрыстая белізна зімы... Цяперашняя восень у Беларусі здзіўляе сюрпрызамі: яшчэ напрыканцы кастрычніка прыемнае сонечнае надвор'е змянілі халады, замаразкі і… завеі. Эфектнай кульмінацыяй стаў цыклон Gisi, што прыйшоў са Скандынавіі: усяго за суткі па краіне выпала небывалая для гэтага сезона колькасць снегу. Напрыклад, у Віцебску ўпершыню за 70 гадоў быў пабіты лістападаўскі рэкорд снежнага покрыва: у 1947-м метэаролагі зафіксавалі 11 см, у 2016-м – 16 см. А ў некаторых кропках самага паўночнага рэгіёна Беларусі яно даходзіла нават да 26 см!
І ўсё ж, нягледзячы на цяжкасці, якія даставілі раннія снегапады аўтамабілістам, дарожным і камунальным службам, ужо за месяц да надыходу каляндарнай зімы беларусы адчулі набліжэнне самай чароўнай пары года…
У асенне-снежным альбоме – фотакадры з розных куткоў Беларусі…
