Урачыстае шэсце ратавальнікаў і тэхнікі МНС разгарнулася 23 ліпеня на праспекце Незалежнасці напярэдадні святкавання Дня пажарнай службы Беларусі, гісторыя якой налічвае больш за 160 гадоў. У ім прынялі ўдзел прадстаўнікі ўсіх абласных падраздзяленняў па надзвычайных сітуацыях, ветэраны службы, юныя ратавальнікі, а таксама - упершыню - авіяцыя МНС.
Ганаровае права адкрыць парад дасталася групам сцяганосцаў Камандна-інжынернага інстытута МНС. У святочнай калоне гледачы ўбачылі пажарныя духавыя аркестры, спецыяльную тэхніку - каля 30 аўтамабіляў, самы стары з якіх сышоў з канвеера ў далёкім 1938-м годзе, а таксама рарытэтныя сродкі пажаратушэння - конна-бочачны ход з коньмі і помпава-лінейны ход.
Пасля парада святочныя мерапрыемствы перамясціліся ў сталічны Парк Горкага, дзе для шырокай публікі адбыўся пляц-канцэрт узвода ганаровай варты, дэманстрацыя плавальных сродкаў МНС і выступленне духавых аркестраў. Акрамя таго, дарослыя і дзеці змаглі апрабаваць сучасную тэхніку і пажарна-тэхнічнае ўзбраенне беларускіх ратавальнікаў, якія кожны дзень прымяняюцца ў службовай практыцы.
Фота: Максім Гучак