"Кветкі Вялікай Перамогі": інтэрактыўны музей-бус курсіруе па Беларусі

Незвычайны мабільны музей, прысвечаны Дню Перамогі, пачаў сваё падарожжа па гарадах Беларусі 7 мая. У рамках праекта "Кветкі Вялікай Перамогі" першы рэйс аўтобуса пачаўся са сталіцы, дзе быў дадзены афіцыйны старт мерапрыемству.

Маршрут унікальнага музея на колах пралягаў па праспекце Незалежнасці да стэлы "Мінск – горад-герой". Менавіта тут Беларускі рэспубліканскі саюз моладзі, Федэрацыя прафсаюзаў Беларусі і Беларускае грамадскае аб'яднанне ветэранаў аб'явілі афіцыйны пачатак рэспубліканскага патрыятычнага праекта "Музей-бус "Кветкі Вялікай Перамогі". Парк Перамогі, Цэнтральны Дом афіцэраў, Кастрычніцкая плошча – у гэтых месцах мінчан і гасцей горада запрашаюць наведаць экспазіцыю інтэрактыўнага музея ў бліжэйшыя дні.

Макеты і муляжы зброі, элементы рыштунку, амуніцыі і ваеннай уніформы, калекцыя галаўных убораў, прадметы ваеннага побыту, дакументы і ўзнагароды ўдзельнікаў вайны, – з усімі гэтымі экспанатамі змогуць азнаёміцца наведвальнікі музея-буса. Сярод арыгінальных артэфактаў часоў Вялікай Айчыннай вайны – сапраўдны патэфон, рарытэтныя пласцінкі з даваеннымі савецкімі песнямі, унікальная карта-схема аператыўнай абстаноўкі пачатковага перыяду вайны, выкананая ўручную беларускім вучоным-археолагам Уладзімірам Ісаенкам, рэдкая літаратура з разнастайным картаграфічным матэрыялам з серыі "Бібліятэчка афіцэра" і многае іншае.

Гасцей арыгінальнай выстаўкі на колах чакае эфект поўнага акунання, які забяспечаць сучасныя тэхналогіі – "віртуальная кіназала" са зручнымі крэсламі-трансформерамі і акулярамі віртуальнай рэальнасці. Ажывіць гісторыю і троххвілінны фільм-успамін пра падзеі Другой сусветнай вайны ў панарамным фармаце, створаны дзякуючы ініцыятыве "Памятаем усё" кампаніі Wargaming сумесна з ваенна-патрыятычным паркам "Патрыёт".

Перасовачная выстаўка прадоўжыць сваё падарожжа па ўсіх абласных цэнтрах краіны. Акрамя таго, наведаць бясплатную інтэрактыўную выстаўку ў Год малой радзімы змогуць і жыхары малых гарадоў Беларусі.

Музей-бус "Кветкі Вялікай Перамогі" – у перадсвяточным фотарэпартажы!