ГАРАДЫ БЕЛАРУСІ: Галоўныя выдатныя мясціны Гродна ў летнім турыстычным гайдзе

На самым захадзе Беларусі на высокім беразе Нёмана, там, дзе перасякаюцца шляхі, што вядуць з суседніх Літвы і Польшчы, размясціўся адзін з важнейшых гісторыка-культурных цэнтраў нашай краіны – горад Гродна, які ў гэтым годзе рыхтуецца адзначыць свой юбілей (15 верасня яму споўніцца 890 гадоў). Заснаваны ў 1128-м як прыгранічны горад-крэпасць, ён пераадолеў разруху і спусташэнне ў гады ваеннага ліхалецця і адрадзіўся, ператварыўшыся ў сучасны абласны цэнтр, захаваўшы пры гэтым унікальную гістарычную забудову і дзіўную атмасферу.

Адзін з буйнейшых цэнтраў каталіцызму, культурная сталіца Беларусі 2014 года і старадаўні горад-музей пад адкрытым небам: сёння дзякуючы бязвізаваму рэжыму, уведзенаму ў кастрычніку 2016 года, Гродна прымае гасцей з усяго свету. Менавіта тут у 1940-я жыў і працаваў у газеце "Гродненская правда" Васіль Быкаў, натхняўся гарадскімі пейзажамі празаік Уладзімір Караткевіч, складалі лірычныя радкі паэты Эліза Ажэшка і Максім Багдановіч, ствараў свае першыя эскізы мастак-сцэнограф Леон Бакст, які праславіўся як аўтар дэкарацый да дзягілеўскіх "Рускіх сезонаў".

А сёння па выбрукаваных вуліцах гістарычнага цэнтра Гродна прагульваюцца сотні турыстаў, атрымліваючы асалоду ад яго атмасферы і захапляльных відаў на раку Нёман і выдатныя мясціны, у ліку якіх як старадаўнія – Стары і Новы замкі, Кафедральны касцёл святога Францішка Ксаверыя,  Свята-Барыса-Глебская (Каложская) царква, лютэранская кірха, так і больш сучасныя – Свята-Пакроўскі кафедральны сабор, Гродзенскі абласны драматычны тэатр, Савецкая плошча...

У нашым гайдзе вы знойдзеце самыя прыгожыя і папулярныя мясціны ў Гродне. А калі ж стоміцеся ад гарадской мітусні, то за свежымі ўражаннямі, яркімі фарбамі і прыроднымі пейзажамі прапануем вам адправіцца на вывучэнне выдатных мясцін Гродзенскага раёна.

Belarus.by запрашае ў падарожжа па летнім Гродне і яго наваколлі!