Беларусь памятае: Дзень Перамогі святкуе ўся краіна!

Свята са слязамі на вачах – 73-ю гадавіну Вялікай Перамогі – урачыста адзначае ўся краіна. Аддаць даніну памяці героям вайны на вуліцах і плошчах сабраліся сотні тысяч чалавек: святочны марафон аб'яднаў шэсці, мітынгі, гістарычныя рэканструкцыі, канцэрты, а галоўнае, самыя шчырыя, кранальныя віншаванні ветэранам. І, вядома, мільёны беларусаў у сваіх сем'ях – гартаючы альбомы з пажаўцелымі фатаграфіямі, чытаючы радкі напісаных на фронце або ў акупацыі пісем, трымаючы ў руках заслужаныя крывёю і потам ваенныя ўзнагароды – успаміналі сваіх родных, чые лёсы апаліла вайна...

У час традыцыйных шэсцяў да манументаў Перамогі ў краіне адбылася рэспубліканская акцыя "Беларусь памятае" – кожны жадаючы змог стаць яе ўдзельнікам, прайшоўшы ва ўрачыстай калоне з партрэтамі блізкіх, якія ўдзельнічалі ў вайне.

У сэрцы краіны – горадзе-героі Мінску – галоўнай пляцоўкай свята стала плошча Перамогі. Тут, усклаўшы кветкі да манумента Перамогі і ўшанаваўшы бессмяротны подзвіг загінулых герояў мінутай маўчання, кіраўнік дзяржавы Аляксандр Лукашэнка павіншаваў усіх жыхароў Беларусі з гэтай памятнай датай.

Удзячнасць за бессмяротны подзвіг і вечны боль у сэрцах аб тых, хто аддаў жыццё за мірнае неба над галавой – Беларусь памятае Вялікую Перамогу!..