Навіны Беларусі

Беларусь і Казахстан актыўна выбудоўваюць узаемаадносіны ў інтэграцыйных аб'яднаннях - А.Лукашэнка

7 лютага, Мінск /Аліна Грышкевіч - БЕЛТА/. Беларусь і Казахстан актыўна выбудоўваюць узаемаадносіны ў інтэграцыйных аб'яднаннях. Аб гэтым заявіў Прэзідэнт Беларусі Аляксандр Лукашэнка сёння на сустрэчы з Надзвычайным і Паўнамоцным Паслом Рэспублікі Казахстан у Рэспубліцы Беларусь Анатолем Смірновым, які завяршае сваю дыпламатычную місію ў нашай краіне, перадае карэспандэнт БЕЛТА.

Кіраўнік дзяржавы канстатаваў, што яшчэ адзін наш сябар па аб'ектыўных прычынах пакідае краіну. Анатоль Смірноў, які тры гады прапрацаваў у Беларусі, завяршае сваю дыпламатычную місію. Аляксандр Лукашэнка выказаў перакананасць, што пасол у краіне прысутнасці павінен паляпшаць адносіны паміж дзяржавамі і ва ўсёй палітры ўзаемаадносін і праблем знаходзіць лепшае, бачыць тыя праблемы, якія трэба вырашаць. "На жаль, гэта не заўсёды так. Беларусь бачыць гэта на сваім вопыце. Вы якраз з'яўляецеся тым чалавекам, якога ў поўным сэнсе гэтага слова можна назваць пасланнікам дружалюбнага нам Казахстана, з якім у нас выбудоўваюцца стратэгічныя адносіны", - адзначыў Аляксандр Лукашэнка.

Прэзідэнт падкрэсліў, што Беларусь і Казахстан сёння знаходзяцца ў самым блізкім інтэграцыйным эканамічным аб'яднанні, а таксама ў ваенна-палітычным аб'яднанні. Аляксандр Лукашэнка адзначыў, што ёсць заслуга Анатоля Смірнова ў такім цесным інтэграцыйным супрацоўніцтве: "Вы заўсёды былі актыўным чалавекам і заўсёды актыўна, наколькі гэта магчыма, развівалі нашы адносіны".

Аляксандр Лукашэнка выказаў словы вялікай удзячнасці паслу Казахстана за яго істотны ўклад у развіццё беларуска-казахстанскага ўзаемадзеяння. Ён адзначыў, што ў Беларусі заўсёды рады будуць бачыць Анатоля Смірнова. Кіраўнік дзяржавы таксама падкрэсліў, што таму, хто прыедзе на змену Анатолю Смірнову, створаны ўсе неабходныя ўмовы для дзейнасці на карысць развіцця двухбаковага супрацоўніцтва.

адправіць

версія для друку

зрабіць стартавай

дабавіць у выбранае