Навіны Беларусі

А.Лукашэнка лічыць магчымым прадухіленне другой хвалі крызісу пры жаданні ўсіх сусветных ігракоў

19 студзеня, Мінск /Кар. БЕЛТА/. Прэзідэнт Беларусі лічыць магчымым прадухіленне другой хвалі сусветнага крызісу, калі будзе жаданне ва ўсіх сусветных ігракоў змагацца з ім. Аб гэтым Аляксандр Лукашэнка заявіў у інтэрв'ю вядучым кітайскім СМІ напярэдадні 20-годдзя ўстанаўлення дыпламатычных адносін паміж Беларуссю і Кітаем, паведамляе карэспандэнт БЕЛТА.

"Калі ж і Кітайская Народная Рэспубліка, і СМІ Кітая пачалі аб гэтым гаварыць, то гэта сур'ёзна. Магчыма, менш небяспечна для Кітая, хоць таксама небяспечна - эканоміка разагрэта, тэмпы шалёныя, насельніцтва вялікае, людзей карміць трэба. Гэта, зразумела, вельмі важна і небяспечна для любой дзяржавы, а тым больш для такой гіганцкай, з такой інерцыяй, як Кітайская Народная Рэспубліка. Для ўсіх гэта небяспечна", - падкрэсліў кіраўнік дзяржавы.

"І паглядзіце, што адбываецца нават у Амерыцы. Вось яны неяк дыстанцыруюцца ад Еўропы. Відаць, перадвыбарная кампанія пачалася, і яны неяк прыхарошваюць рэчаіснасць, але ж мы бачым - "Захапілі Уол-стрыт" і іншае, дэманстрацыі, маніфестацыі, абвал нядаўні. Крызіс і абвал пачаўся з Амерыкі, там гэтыя працэсы яшчэ тлеюць, яны не ліквідаваны. Паглядзіце, які дзяржаўны доўг ЗША. Гэта ж інфляцыя долара па ўсім свеце. І вельмі не выгадна, перш за ўсё, Кітаю, таму што ў вас і каштоўных папер амерыканскіх куплена нямала, і ў вас золатавалютныя рэзервы вышэйшыя за трыльён. У вас долараў гэтых мора і вам хацелася б, зразумела, каб долар быў стабільным. І ў той жа час вы можаце абваліць гэты долар, але, напэўна, гэта не патрэбна, бо вы маглі гэта зрабіць у мінулы крызіс, але, малайцы, захавалі планету ад развалу", - сказаў Прэзідэнт.

Ён прадоўжыў: "А ў Еўропе паглядзіце, што адбываецца... Я ўжо называў - Італія, Іспанія, Партугалія, Грэцыя. А Вялікабрытанія, Францыя, нават Германія! Вось два дні таму ўжо і для гэтых дзяржаў крэдытны рэйтынг паніжаны быў. Дэманстрацыі вакол. А вось гэта напружанасць паміж Іранам і Злучанымі Штатамі Амерыкі. Ужо даходзіць да нафтавых эмбарга і гэтак далей. Добра, што Кітайская Народная Рэспубліка не далучылася да гэтага. Але ж гэта сабе на шкоду, бо вы шмат купляеце нафты ў Іране - навошта вам гэта бойка".

Аляксандр Лукашэнка канстатаваў, што відавочныя праяўленні крызісу: "І ўжо кіраўнік МВФ гаворыць аб тым, што гэты будзе крызіс, і што гэта можа скончыцца больш страшнай дыпрэсіяй, чым у трыццатыя гады мінулага стагоддзя. Гэта значыць сімптомы гэтага крызісу відавочныя - і спад вытворчасці ў вядучых эканоміках свету".

Разам з тым Прэзідэнт выказаў меркаванне, што крызіс можна прадухіліць. "На цяперашнім этапе з крызісам справіцца можна, калі будзе жаданне ва ўсіх сусветных ігракоў змагацца з гэтым крызісам. Мы не прайшлі пункт незвароту, мы яшчэ не ўлезлі ў гэтыя крызісныя з'явы па вушы. Таму сёння трэба крызіс прадухіліць. І Кітайская Народная Рэспубліка тут павінна сыграць разам з амерыканцамі вядучую ролю", - падкрэсліў беларускі лідар.

Адказваючы на пытанне адносна таго, як зменіцца, на думку Прэзідэнта, абстаноўка сусветнай бяспекі ў гэтым годзе, Аляксандр Лукашэнка сказаў: "Хацелася б, каб былі змяненні да лепшага. Але ёсць вельмі негатыўны зачын з мінулага года, які мы назіраем у гэтым годзе. Вельмі нестабільна на арабскай дузе. Вы бачыце, што адбываецца з Сірыяй (там відавочны і замежныя ўмяшанні). Калі б не Кітай і Расія, то Сірыю ўжо, напэўна, даўно раздавілі б".

Пры гэтым ён падкрэсліў: "Ні Кітаю, ні Расіі, ні іншым краінам, якія хочуць жыць у міры і дружбе, гэта дэстабілізацыя не патрэбна. Вы бачыце, што адбываецца ў краінах арабскага ўсходу, дзе перамаглі так званыя дэмакратычныя рэвалюцыі. Там лепш не стала. Да ўлады прыходзяць не тыя сілы, на якія нехта разлічваў. Але трэба было гэтага чакаць. Тое ж самае можа і з Сірыяй адбыцца. Паглядзіце, што адбываецца вакон Ірана... Але калі рване там, дзе 40 працэнтаў сусветнай нафты здабываюць, гэта будзе вельмі цяжка для ўсёй планеты, эканамічны крызіс тады непазбежны. І ён прывядзе да моцных сацыяльных узрушэнняў. Магчымы і канфлікты ў іншых частках планеты. Нават у Еўрасаюзе, у Еўропе, паглядзіце, як абвастрыліся адносіны. Гэта значыць тыя тэндэнцыі, якія былі скрытыя, нябачныя, цяпер яны пачалі праяўляцца".

"Таму разлічваць на тое, што 2012 год будзе бязвоблачным... я так не сказаў бы. Але хацелася б, каб было больш спакойна", - адзначыў кіраўнік дзяржавы.

адправіць

версія для друку

зрабіць стартавай

дабавіць у выбранае