Бізнес-навіны
Арганізацыі Мінэнерга правядуць у час Беларускага прамысловага форуму перагаворы з партнёрамі аб супрацоўніцтве
6 мая, Мінск /Таццяна Іванюк - БЕЛТА/. Арганізацыі Міністэрства энергетыкі правядуць перагаворы з партнёрамі аб супрацоўніцтве ў час Беларускага прамысловага форуму, які пройдзе ў Мінску з 12 па 15 мая. Аб гэтым сёння на прэс-канферэнцыі паведаміў першы намеснік міністра энергетыкі Беларусі Леанід Шанец, перадае карэспандэнт БЕЛТА.
"У рамках форуму запланаваны шэраг мерапрыемстваў, якія дадуць магчымасць правесці перагаворы", - сказаў першы намеснік міністра. Ён адзначыў, што мерапрыемства карыстаецца поспехам: многія кампаніі, як замежныя, так і беларускія, заключаюць дагаворы і кантракты, якія паспяхова рэалізуюцца ў Беларусі і за яе межамі.
Леанід Шанец таксама выказаў упэўненасць, што форум пройдзе на такім жа высокім узроўні, як і ў мінулым годзе. "Калі планавалі ўдзел Міністэрства энергетыкі ў форуме, разлічвалі, што мы зоймем плошчу амаль 54 кв.м, але гэта будзе больш за 63 кв.м", - звярнуў увагу першы намеснік кіраўніка ведамства.
Ён таксама паведаміў, што ў мерапрыемстве штогод прымае ўдзел 250-300 арганізацый. На працягу апошніх 10 гадоў амаль 150 кампаній з'яўляецца рэгулярнымі ўдзельнікамі.
Беларускі прамысловы форум-2015 уключае чатыры міжнародныя выстаўкі: "Прамэкспа - сучасны завод", "Прамэнерга", "Энергарэсурсазберажэнне і экалогія", "Навука і інавацыі". У экспазіцыях будуць прадстаўлены абсталяванне, інструменты і матэрыялы для тэхналагічнай аснасткі прадпрыемстваў прамысловасці, найноўшае энергетычнае і электратэхнічнае абсталяванне, энергаэфектыўныя і рэсурсазберагальныя тэхналогіі, а таксама абсталяванне і матэрыялы тэхналогій аховы навакольнага асяроддзя ў прамысловасці, энергетыцы, будаўніцтве і жыллёва-камунальнай гаспадарцы.
Мінэнерга на выстаўцы "Прамэнерга" прадставяць адкрытыя акцыянерныя таварыствы "Белэнергарэмналадка", "Белаазерскі энергамеханічны завод", "Белэлектрамантажналадка", "Навагрудскі завод газавай апаратуры", РУП "Белгазтэхніка", ДІПК "Газ-Інстытут", філіял "Інфармацыйна-выдавецкі цэнтр" ААТ "Эканомэнерга".
версія для друку
зрабіць стартавай
дабавіць у выбранае